تحدي ال ٢٩ يوم 💙🌌.
اني رسل
احب اعرف عن نفسي حسب الغرض اللي اجيت علموده بأني طالبة هندسة معماري مرحلة اولى
بداية مشاركتي بهالتحدي جان محاولة لأكسر الجمود اللي بحياتي بفكر ،محاولة وبداية جديدة لمحطة جديدة لشغلة احب اطورها اللي هي دراسة المعماري جان حلم الطفولة وهسا حب اليوم وشغف المستقبل وجان المستوى اللي اسعى ال مثل كل مرة ،الاحتراف..
جنت دائما اشوف الناس الناجحين عبارة عن كتلة من المعجزة او شي مموجود بطبيعتنا كإنس ع سبيل المثال مجنت احس او افكر ان هم تعبوا يلا وصلوا هنا ولا جنت افكر المشاكل اللي واجهتهم جنت دائما متطلعة لمستواهم المهني وهذا اللي خلاني بدائرة احباط جبيرة وتساؤلات لما لا نهاية "ليش اني مو هيج هم ؟" ، هذا الشي اثر على حياتي على مدى ال 15 سنة واكثر بدوامة الانتظار " شوكت تجي اللحظة المثالية اللي اسوي بيها الشي اللي احبه واني سعيدة ومرتاحة وبدون تعب "
محاولت بيوم ان ابدي من نفسي بدون ضغط خارجي كل انجازاتي جانت متتعدى حدود المدرسة لان جنت انجبر على القراية ومع هذا جنت متميزة لان الحلم الوحيد اللى اكدر احققه بوجود المدرسةة هو المعماري غير هيج اني ممسوية اي شي.. حرفيًا.. اي شي خارج المدرسة
اليوم صرت طالبة جامعية والوضع اختلف وباجر حكون متخرجة راح انتظر احد يضغط عليه يلا ابدي خطواتي العظيمة السعيدة "حسب ما جنت افكر" ؟
لكل موضوع اله احتمالين سلبي وايجابي بس حقيقته هي المنتصف ، الجزا الرمادي بين الابيض والاسود
المقارنة مع الكبار واللي الهم خبرات طويلة ولّد عندي مقارنة سلبية ومو دائما المقارنة سلبية.. اكو ناس بالمقارنة تتنمى عدهم روح المنافسة وتكون نقطة قوة ودافع الهم، والحقيقة ان المقارنة ماتسوي شي لان هي تشبه الاطلاع ع حياة الاخرين وحياتك بس المشاعر اللي تجيك وكتها هي تمثل قوة تفكيرك او عاطفتك
بس ال"نص ساعة" اللي فكر بيها مرتضى اكدر اكول هي نقذت "نص حياتي" ؟
اني صحيح اللي حاولت بس انت جنت الفكرة هنا واني جنت الناس اللي يحاولون يجربوها اذا تنفع
خصوصا جنت بمرحلة فك عقدة المثالي هاي واتخلص من شي اسمه "هذا مو الوقت الصح " و "هذي مو النتيجة اللي ردتها" فجانت فرصة اشبه بالحلم ان اشارك بيها، كلت اريد احاول هالمرة واسلك طرق الناس اريد اشوفها شبيها وشنو الجزأ اللي جنت اخذه منها
هسا كل اللي سويته اني بهذا التحدي من انجاز عظيم بلغت التقييم الرينج اللي ردته وهذا شي يدعوا للفخر
الحلو بالموضوع ان الطريق مجان صعب بالمعلومات والحياة المهنية هاي او يمكن تعودت على تعب المعماري.. مادري..
بس الصعوبة الاكبر جانت بالبداية والاستمرارية رغم المشاكل اللي تواجهك
شفت المحيط اللي مجنت شايفته جوا النجاح المبهر للناس ورغم نجاحي بسيط بس من بطلت فكرة المقارنة واتمنى للناس الخير كلشي حلو ديصيرلي! هذا شي عظيم !
شفت التعب النفسي والسهر والبحث وساعات الشغل ومن تنتظر النتيجة ويخيب ظنّك
والاحلى من كل هذا..
هو عظمة اللي تحس بي من تعزز لنفسك وتحل مشاكلك بنفسك مهما جانت صغيرة بدون طلب مساعدة او بمساعدة صغيرة من الناس و ان "الناس للناس" اذا ساء وضعك وان " إنَّ بعد العُسر يُسرا" بالتأكيد
واذا جنت دتخضع لمعايير الانسان المثالي فحتعيش مُتعب نفسيا
والسعادة بالرضى والمحاولة وشكر الرب ونفسك لان حاولت وللناس اللي ساعدوك توصل
والتامل تنقية الروح
وسؤ ال ال"ليش" هو الشجاعة والحرية اللي يوصللها " الانسان الحقيقي"
والمحاولة للشجعان وللمتعبين القويين حتّى
ومهما بلغ مستوى تفكيرك عن عمق فهمك للي تشوفه فأنت لازلت بالقمة ومشفت شي من القاع بعد
وان الكل جميل ومحارب بطريقته الخاصه فمرتضى بنشر الحب والحياة ، آصف بتعليم القوة والسلام وعادي اذا بعدك متعرف لشنو وبشنو تحارب بس ديحاول مثلي، مثل رسل
وان فعل صغير مثل الشكر حيكون شي لطيف لتقدير جهد الناس والامتنان للي عدنا شي عظيم نسوي لنفسنا
وان الفكرة هي اللي تحلي حياتك او تسودها والصوت اللي سمعته مينمحي الا بالعقل والنقاش
وان الحب موجود
وحبك للي تسوي او تسوي اللي تحبه هو احترامك لوقتك ولروحك
نموذج من بدايات مشروع الاخير النا :
اني صحيح دخلت حتى اجيب تقييم ال80 وبالفعل حصلت عليه بعد مشقات متعبة
بس اللي طلعت بي اكبر من هيج !
منو جان يدري ان بالدرس الواحد عندك الف خطوة معقدة تحلها يلا توصل للناتج ؟ ووحده اللي وصل او اللي تخطى بس حاول بالداية هو اللي يعرف لذة الموضوع
جان تحدي انجاز ال 29 يوم
تحدي تعلم مية شغلة وحل الف مشكلة ب 29 يوم
تعلمت شي يفوق التصميم والرسم والحاسوب شي ثمين ح اكون ممتنة اله لما بقى من حياتي
لل 29 يوم الجايات عدنا رحلات طويلة هواي اتمنى اضل دائما عندي القدرة اتعلم واتفهم واتناقش
جدا ممتنة للفكرة وصاحبها واللي ساعدوا بيها احب اكول ان انتوا ساعدتونا هواي واحنا جدا ممتنين لجهدكم ووقتكم جانت رحلة عظيمة وياكم فعلا " الناس للناس" والحب للكل
وممتنة للرب اللي منحني هالفرصة اللي ما انساها
شكرا للجميع
جانت فرصة عظيمة
ان شاء الله نلتقي بمحطات ثانية 🌌💙.
👏🏻👏🏻👏🏻ماشاء الله كل التوفيق يارب بمشوراك هذا وان شاء الله نشوفك من انجح المعماريات 🤍🤍
ردحذف